ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឱ្យដឹងថា នៅល្ងាចនេះសម្ដេចបានទៅសួរសុខទុក្ខបងទី១ ដែលទើបវិលត្រឡប់ពីទីក្រុងបាងកក ប្រទេសថៃ ក្រោយការវះកាត់។ សម្ដេចបន្ថែមថាទោះបីសុខភាព បងប្រុសទី១ ប្រសើរជាងមុនក្តីតែសម្ដេចនៅតែមិនទាន់ហ៊ានប្រាប់គាត់ពីមរណភាពបងប្រុសទី២ សម្ដេចទេពញាណ ហ៊ុន ណេង នៅឡើយ។
សម្ដេចតេជោ បានសរសេរក្នុងបណ្ដាញសង្គមរបស់សម្ដេចនៅល្ងាចថ្ងៃទី២៧ ខែឧសភានេះថា៖ «២ថ្ងៃមុននេះជាខួបលើកទី៩ឆ្នាំ នៃមរណភាពភរិយារបស់គាត់ដែលត្រូវជាបងថ្លៃរបស់ខ្ញុំ ប្រសិនខ្ញុំជំរាបគាត់ពីរឿងមរណភាពបងទីពីរទៀតប្រហែលគាត់ពិបាកទទួល។ ខ្ញុំក៏ទទួលរងនូវការវាយប្រហារខាងផ្លូវចិត្តខ្លាំងណាស់ដែរនៅពេលដែលបងប្រុសខ្ញុំលើកដៃចង្អុលទៅរករូបថតដែលបងប្អូនខ្ញុំទាំង៦នាក់ ថតជាមួយឪពុកខ្ញុំហើយនិយាយថាបងប្អូនយើងមាន៦នាក់ ប្រុស ៣នាក់ស្រី ៣នាក់ ប្រុស ៣នាក់ដំបូង ទើបមានស្រី ៣នាក់ជាក្រោយ ដោយពុំមានឆ្លាស់គ្នាស្រីនិងប្រុសនោះទេតែគាត់ពុំបានដឹងថាពេល
នេះនៅសល់តែ៥នាក់នោះឡើយ»។
ត្រង់ចំណុចនេះសម្ដេចតេជោ សរសេរថាទឹកភ្នែកសម្ដេចស្ទើរតែហូរចេញមកហើយបែរមុខទៅម្ខាងនិងងាកមកវិញបបួលបងប្រុសទី១ ដូរនាឡិកាដៃដើម្បីបញ្ចប់នូវរឿងសោកសៅនេះ។
សម្ដេចតេជោបន្ថែមថា៖ «ទ្រាំរក្សាទុកដំណឹងនេះមិនឱយគាត់ដឹងមួយរយៈសិនដើម្បីសុខភាពគាត់។សង្ឃឹមថាបងទីមួយនិងវិញ្ញាណក្ខន្ធបងទីពីរនឹងយល់ពីការលំបាករបស់ខ្ញុំនៅពេលនេះ»។
គួរឱ្យដឹងផងដែរថា បងប្រុសទី២ របស់សម្ដេចតេជោ គឺសម្ដេចទេពញាណ ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារជំងឺគាំងបេះដូង។
បងប្អូនរបស់សម្ដេចតេជោ ហ៊ុន សែន មានចំនួន ៦នាក់ ដែលមានទី១ លោក ហ៊ុន សាន ទី២ សម្ដេចទេពញាណ ហ៊ុន ណេង ទី៣ សម្ដេចតេជោ ហ៊ុន សែន ទី៤ លោកស្រី ហ៊ុន សេងនី ទី៥ លោកស្រី ហ៊ុន ស៊ីណាត និងប្អូនស្រីពៅ លោកស្រី ហ៊ុន ប៊ុនធឿន៕
